Суг-Аксы биле Тоора-Хемниң школалары - тиилекчилер

Сүт-Хөл кожууннуң Суг-Аксы болгаш Тожунуң Тоора-Хем ортумак школалары бүгү Россияның ада-иелер каттыжылгаларының бот-идепкейин деткиир мөөрейниң тиилекчилери болган. Олар 500 муң рубль премияны боттарының төлевилелдерин боттандырары-биле алыр.  Тоора-Хем суурга ада-иелерниң бот-идепкейи-биле: «Тожу: өг-бүле болгаш культура» өг-бүле фестивалын организастаар. Ук төлевилел чоннуң, тожу-тываларының езу-чаңчылдарын кадагалаарынче угланган. 

Суг-Аксы суурга Адалар чөвүлелиниң бот-идепкейи-биле «Өлчей» ада-иелерниң этно-мастерскаязы ажыттынган. Аңаа оолдар, уруглар чылгы малдың дериг-херекселдерин кылыр уран чүүлге өөренир. Ол чүгле ус-тывыш кичээлдери эвес, а аныяк-өскенге ада-өгбелерниң билиглерин дамчыдар арга болур. 

Ада-иелер каттыжылгаларының чедимчелиг төлевилелдериниң дугайында Тываның өөредилге сайыдының хүлээлгезин күүседип турар Ренат Ооржак бодунуң блогунда демдеглээн. 

«Тываның ийи школазының, Тоора-Хем болгаш Суг-Аксының, ада-ие каттыжылгалырының төлевилелдери бүгү Россия чергелиг мөөрейге тиилекчилерниң санынче киргени өөрүнчүг болду. Кайызы-даа солун төлевилелдер. Ол школа директорларының кижизидилге талазы-биле чөвүлекчилериниң деткимчези-биле кылдынган. Эгелекчилер-биле ыяап-ла ужуражыр мен. Мөөрейни «Билиг» ниитилели организастаан. Ийиги сезонну чарлап эгелей берген. Тываның ада-иелер каттыжылгалары ам-даа чедиишкинниг киржиринге бүзүрээр мен» - деп, ол дыңнаткан.

https://vk.com/minobrtuva?w=wall-38636573_47758&ysclid=m3x7pi09sq109792756