Вы здесь
Тыва дыл башкызы, шүлүкчү, очулдурукчу база публицист
10.01.2025, 23:14 908 просмотров
Дүүн, январь 8-те, тыва дыл башкызы, билдингир шүлүкчү, очулдурукчу, публицист Меңги Ооржактың төрүттүнген хүнү-биле республиканың башкылар каттыжылгазы байырны чедирген. «Меңги Ооржак – тыва дыл башкызы болурундан аңгыда, шүлүкчү, очулдурукчу, публицист, Россияның Чогаалчылар эвилелиниң кежигүнү (2004), аныяк чогаалчыларның "Саянның чаңгызы" фестивалының киржикчизи (2004), Тыва Республиканың уран-чечен очулга талазы-биле Национал литература шаңналының лауреады (2021).
"Чөпшүл дең" (1999), "Меңги" (2008), "Часкы шинчи" (2024), "Хей-аъдымны эзертепкеш..." (2025) деп шүлүк номнарының автору.
Тыва чогаал, уран чүүл талазы-биле шинчилелдери дараазында тускай чыындылар кылдыр үнгүлээн: "Шүлүк болгаш аялга" (2014), "Бай-Тайга - уран чүүлдүң кавайы" (бөлүк авторлар-биле, 2020), "Сеткилдерниң эртинези" (2024).
Ооң шүлүктери "Ожук дажы" (2003), "Тыва шүлүк чогаалының антологиязы" (2014), "Ынакшылдың одуруглары" (2023), "Тывамны мен алгап тур мен" (2024), "Под знаменем времени" (Крым, 2024) деп антологияларга парлаттынган.
М. Ооржактың очулгазы-биле Ч. Галсанның "Дошкун чылдарның тоожузу" (2020), Р. Гамзатовтуң "Дагларым - мээң чүрээмде" (2024) деп номнары тыва дылга чырык көрген.
Чогаалдары тыва, орус, якут, алтай, хакас, марий, ногай дылдарже очулдурттунуп, солуннарга база сеткүүлдерге үнгүлээн. Меңги Нагаан-оолович Ооржактың юбилейи-биле байыр чедирбишаан, кадыкшылды болгаш чогаадыкчы чедиишкиннерни күзедивис!» - деп, башкының дугайында таныштырып турар.
