Вы здесь
Кожамык байырлалы
10.02.2025, 23:53 1989 просмотров
Тыва чон шаг-тѳѳгүден бээр тѳрээн черинге, ооң кайгамчыктыг тайга-таңдыларынга, аржаан-сугларынга, хемнер-хѳлдеринге ханы ынакшылын кожаң ырларга, улустуң ырыларынга алгап-мактап чорааннар. Кожаң ырылар өзүп олурар салгалдарны тѳрээн черинге ынак, ооң тѳѳгүзүнге хумагалыг, чонунуң ёзу-чаңчылдарынга база улустуң аас чогаалының хевирлеринге ханы сонуургалдыг, аңаа камныг болурунга кижизидер.
Ынчангаш, тыва улустуң онзагай ыры-хөгжүмүнүң хевири - кожамыктарны ырлажып, аныяк-өскен аразынга нептередир сорулгалыг Тыва үндезин культура төвү “Кожамык байырлалы” деп чараш кежээни чонун чыып эрттирген
Ук кежээге Тыва төптүң чыглып келген чону чер-чуртунга тураскааткан кожамыктарны; ада-ѳгбезинден салгал дамчып келген кожаң ырларны; чоннуң азыраан мал-маганының дугайында кожаң ырларны; ажы-тѳлүнге хамаарыштыр ырлап чораан кожаң ырларны; өгбелерниң болгаш оларның салгалдарының ынакшыл, сонуургал темазынга ырлажып чораан кожаңнарын; төрээн черинге ынакшылды, чоргааралды илереткен кожамыктарны артистер-биле катай сагыш-сеткилинден ырлажып турганнар.
Кожамык байырлалынга үлүүн киирип, идекпейлиг киришкен аалчыларывыс РФ-ның алдарлыг артизи, ТР-ның улустуң артизи Айдысмаа Кѳшкендейге, «Тыва кызы» бөлүүнге, "Саян" аттыг хөгжүм болгаш сам театрының аныяк артистери Кежик Дарый-оолга база Амырга Монгушка, Кызылдың уран чүүл колледжизиниң сургуулдары «Сайдаяк» бѳлүүнге, Тыванын үрер хөгжүм оркестриниң хөгжүмчүзү Ачын Чоодуга, “Маны-Саа” студиязының чаптанчыг чаштарынга, Кызыл хоорайның хоочуннар чөвүлелинге, Кызылдың дугаары 9 Гимназиязының башкызы Светлана Чоодуевна Шулу-Маадырга, 19 дугаар школаның башкызы Чочагай Валерьевна Бадыраага база өөреникчилеринге Тыва үндезин культура төвүнүң өмүнээзинден өөрүп четтиргенивисти илередип тур бис!
Ылаңгыя, Тыва Республиканың улустуң хөөмейжизи база алдарлыг артизи, "Ада-иениң алдары"деп орденниң эдилекчизи, "Тыва" бөлүүнүң солизи, тыва кожамыктарның нептередикчизи болуп, «Кожамык байырлалы» деп кайгамчык буянныг хемчегни организастаан Шончалай Оюн-ооловна Чооду-Ооржакка кызыгаар чок өөрүп четтиргенивисти илередир-дир бис.
https://vk.com/wall-20358661_72228
#МинкультурыТыва #кожамык #аас_чогаал #тыва_топ #тыва_төп #тыва_культура
