Вы здесь
Школачылар ортузунга «Сыдым байырлалы» эрткен
24.02.2025, 23:01 1053 просмотра
РФ-тиң Өөредилге яамызының деткимчези-биле Россияның «Билиглер» ниитилелиниң эрттирген ада-иелер каттыжылгаларының эгелекчи саналдарын деткиир мөөрейге Суг-Аксы школазының «Ада-иениң этно-мастерскаязы» тиилээш, 500 муң рубльге төлептиг болган. Олар акша-хөреңги-биле даараныр машиналар болгаш өске-даа эт-херекселдерни саткан.
Бо хүннерде Сүт-Хөл кожууннуң Суг-Аксы ортумак школазынга Адалар чөвүлелиниң бот-идепкейи-биле «Өлчей» ада-иелер этно-мастерскаязының ажыдыышкынынга тураскааткан кожуун чергелиг «Сыдым байырлалы» болуп эрткенин сагындыраал. Ол дугайында кожууннуң башкылары социал четкилерде бижээн.
«Бичии оолдар чылгы малдың дериг-херекселдерин кылып өөренип олурда, карактары хып турарын эскердим. Олар дыка сонуургаан. Чайгы дыштанылга үезинде социал төпте уруглар, оолдарга база мастер-класстарны эрттирип турган бис. Ада-иелерниң бот-идепкейин күрүне деткип турары өөрүнчүг-дүр. Уругларымның өөренип турар школазын деткээнинге четтиргенимни илереттим. Школавыс езулуг-ла чаңгыс аай, бир демниг команда болдувус» - деп, «Чаш назынның навигаторлары» федералдыг төлевилелдиң координатору Оргаадай Монгуш демдеглээн.
Аныяк башкылар школа директорунуң чөвүлекчизи-биле кады Сайгарлыкчыларга деткимче фондузу-биле кады ажылдажылганы дугуржуп, уругларны Тыва культура төвүнче экскурсияладып чедирген. Школачылар моон-даа соңгаар удаа-дараа мастер-класстарга барып, ус-шеверлерниң арга-дуржулгазын алыр аргалыг.
«Сыдым байырлалы уругларның сонуургалын улам оттурган. Кожууннуң шупту школаларындан өөреникчилер тыва национал хептерин кедип алгаш, аъттың дериг-херекселдериниң дугайында мөөрейлерге киржип турда көөрге, чоргааранчыг-дыр. Школаның удуртулгазы мөөрейлерге киириштирер дээш аъттарны малчын аалдардан дилеп алган. А аалчыларны тыва өгге уткуп, хүндүлээн. Команданың кежигүннери: өөреникчи, башкы база ача бир демниг кештен херекселдерни кылып турарын көөрге, өөрүнчүг болбас арга чок. Бо төлевилелдиң үре-түңнели уламчылап, Суг-Аксы ортумак школазындан ус-шевер мастерлер үнүп кээр болза, ол дег аас-кежик кайда боор» - деп, башкы түңнээн.
