Вы здесь
Тожу кожуунга «Тожу: өг-бүле болгаш культура» деп онзагай фестиваль болуп эрткен
28.02.2025, 17:18 1025 просмотров
Тожу кожуунга «Тожу: өг-бүле болгаш культура» деп онзагай фестиваль болуп эрткен. Ооң кол сорулгазы – Россияның эвээш санныг үндезин чоннарының өг-бүле чаңчылдарын быжыглаары болгаш езу-чаңчылдарга үндезилеттинген мөзү-шынар кижизидилгезинде үнелиг чүүлдерни кадагалаары. Фестивальга эвээш санныг үндезин чурттакчыларның федералдыг даңзызынче кирген өг-бүлелер киришкен. РФ-тиң Өөредилге яамызының деткимчези-биле Россияның «Билиглер» ниитилелиниң эрттирген ада-иелер каттыжылгаларының эгелекчи саналдарын деткиир мөөрейге ук төлевилел тиилээнин сагындыраал.
Педагогика эртемнериниң кандидады Маргарита Кунгаа «Тожуларның чаңчылчаан культуразында уруг болгаш ооң чашкы үези» лекцияны чыылганнарга таныштырып тургаш, тожу-тываларынга бичии чаштарның ойнаар чадырлары турганын демдеглээн. Ол чүүл өг-бүледе чаш уругнуң онзагай байдалын херечилеп турар. Оон аңгыда тожу-тывазы, «Ак» каттыжылганың даргазы Ирина Ак болгаш өскелер-даа Тожу чонунуң амыдыралында онзагайларын чугаалап турган.
Фестивальга киржип келген ада-иелер болгаш өөреникчилер чонунуң культуразындан чаа-чаа чүүлдерни билип алганын демдеглевишаан, чамдык проблемниг айтырыгларны шиитпирлээриниң аргаларын чугаалашкан.
Фестивальдың киржикчилери «Улуг-Хемниң бажы» каттыжылганың кежигүнү Аида Даржаптың черлик амытаннарның кежин эттээри болгаш ону шыгжаарының дугайында мастер-классты сонуургаан. Ол ышкаш школаның башкылары тожу-тываларының чаңчылчаан аъш-чемин делгээн.
«Бо фестивальды чурттакчы чон аажок сонуургап турар. Ооң мурнунда чылдарда тожу-тываларының езу-чаңчылдарын кадагалаарынга хамаарышкан улуг масштабтыг хемчеглерге школачылар ада-иелери-биле киржир таварылга болбаан. Ада-иелер каттыжылгазының төлевилели тиилеп, мындыг солун хемчегни организастааны өөрүнчүг-дүр. Фестиваль школачыларга-даа, ада-иелерге-даа үнелиг чүүлдерни арттырарынга идегеп тур мен» - деп, школаның директору Артур Монгуш демдеглээн.
Фестивальга Тываның Өөредилге яамызының, «Чаш назынның навигатору» федералдыг төлевилелдиң төлээлери болгаш Каа-Хем кожууннуң школаларының кижизидилге талазы-биле чөвүлекчилери идепкейлиг киришкенин сагындыраал.
