Вы здесь
«ТУБТЕН ШЕДРУБ ЛИНГ» төп буддисчи хүрээде шажын школазының баштайгы хуурактары
11.03.2025, 18:39 1044 просмотра
Тываның Өөредилге яамызы «ТУБТЕН ШЕДРУБ ЛИНГ» төп буддисчи хүрээде шажын школазының ажыл-чорудулгазының чөпшээрелин алган болгаш, уругларга база улуг-даа улуска немелде өөредилге программазын боттандырып эгелээнин чоокта чаа дыңнаткан. Ооң баштайгы хуурактары шажын талазы-биле билиглерни ап эгелээн. Оларның аразында бичии хуурак Тензин Сатты таныштыраал.
Тензин Сат Кызыл хоорайның 5 дугаар гимназиязының 2 «а» клазында өөренип турар. Амгы үеде ол төвүт дылды өөренип, чамдык сөзүглелдерни безин номчуп эгелээн. Хүрээде шажын кичээлдери суббота санында эртип турар.
«Шажын талазы-биле өөренири меңээ ындыг-ла берге эвес-тир. Төвүт дыл кичээлдеринде авам-биле кады барып тур мен, кичээл бүрүзүнүң видео-материалын кылып алгаш, бажыңга катаптаар. Школада сан кичээлинге ынак мен. Хүрээде кичээлдерден аңгыда, Кызылдың немелде өөредилге төвүнүң англи дыл база шыдыраа бөлгүмнеринде барып турар мен. Беш харлыымдан тура «Кога» дзюдо клувунуң кежигүнү мен» - деп, бичии Тензин таныштырган.
