Вы здесь
Кижизидикчи башкылар Мөңгүн-Тайга кожуунда
14.03.2025, 21:42 1904 просмотра
Республика чергелиг школа назыны четпээн уруглар өөредир албан черлериниң башкыларынга «Өгбелерниң чечен-мергенинге өөрениили» деп Шагаа байырлалынга тураскааткан эртем-практиктиг конференция март 13-15 хүннеринде Мөңгүн-Тайга кожуунда болуп эртип турар. Хемчегниң пленарлыг кезээнге шылгараңгай ажылдап чоруур башкыларны болгаш удуртукчуларны шаңнап-мактаан. Тыва Республиканың Өөредилге яамызындан түр када хүлээлгезин күүседип турар сайыттың оралакчызы Белекмаа Ондар база кол специализи Урана Допул келген башкыларга чылыг-чымчак сөзүн чугаалааннар.
Конференцияның пленарлыг кезээнге улаштыр Национал школа хөгжүдер институттуң директору база улуг методизи Альбина Монгуш илеткелдерни номчаан. Хемчегде ийи ажылчын шөлчүгеш ажылдап турар. Бирээзинде уруглар садтарының кижизидикчи башкылары, ийи дугаар ажылчын бөлүкте школа башкылары арга-дуржулгалары-биле солчуп, боттарының ажылын чорудуп турарлар. Ниитизи-биле 180 башкы киржип келген.
База ол ышкаш тус черниң ус-шеверлериниң болгаш уруглар садтарыңың кижизидикчи башкыларының ажылдарын делгеп салган.
Хемчегге Мөңгүн-Тайга, Өвүр, Бай-Тайга, Барыын-Хемчик, Улуг-Хем, Чеди-Хөл, Чаа-Хөл, Тожу, Таңды кожууннарның идепкейлиг башкылары база Кызыл хоорайның уруглар садтарының эргелекчилери киржип келгеннер. Шак мындыг хевирлиг республика чергелиг хемчег ийи дугаар чыл болуп эртип турар. Бир дугаар чылын Өвүр кожуун организастап эрттирген.
#минобразованиятыва #ирнш #детскиесадытувы #шагаа
