Вы здесь
Тывадан ам база бир бөлүк чычааннар ТШО-же шуужуп үнген
14.04.2025, 15:55 358 просмотров
Апрель 10-да Дөгээ дааның эдээнден “Автопоезд” деп Бүгү-российжи акция ёзугаар 9 автомашина тускай шериг операциязынче шуужуп үнген.
Чүзүн-бүрүн өңнерлиг, аңгы-аңгы маркалыг болгаш хемчээлдиг техниканы Тываның эриг баарлыг чурттакчылары болгаш күрүне организациялары дайынчы оолдарга белеткээн. Бо автомашиналарның ачызында янзы-бүрү даалгаларны эрес-дидим оолдар чедиишкинниг күүседиринге идегеп, чорудуп турарлар. Техниктиг үрелиишкиннерлиг чычааннарны организациялар ажылдакчылары акшалар чыышкаш, бир дем-биле септеп үндүрүпкеннер.
Автоколонна Саян дагларын ашкаш, Абакандан демир-орук-биле Донда Ростовче чедер. Улаштыр дайынчы оолдарывыска техниканы дамчыдар.
“Бистиң республикадан дидим оолдарывыстың хөөнүн көдүрери-биле, автомашина бүрүзүнге Тывадан чоруткан деп барымдаа көргүзүп турар бижиктерни чыпшырдывыс. Чамдык организациялар, чижээ, Тываның аныяктар ажыл-херээ-биле яамы болгаш Тывада янзы-бүрү ажыл-агыйларны хайгаараар болгаш чөпшээрел бижик бээр албан чортуп турар автомашиназының бир талазынга төөгүлүг маадырывыстың — Чүргүй-оол Намгаевич Хомушкунуң портредин кайгамчык кылдыр чураан” – деп, Тывада Улусчу фронтунуң аныяктар салбырының координатору Дариймаа Ховалыг демдеглээн.
Автоколоннаны Абаканче автоволонтерлар чедирер. Олар ачы-дуза хемчээнче боттарының үлүг-хуузун киирер күзелин илереткеннер. ТШО-нуң киржикчизи Сайгын Бюрбю, бо техниканың дайын шөлүнге чугулазын бодунуң чижээнге эки билир. Суглаарда, аъш-чем садып алырда, балыгланган оолдарны дүргени-биле эмнелгеже чедирерде чычаан херек.
Күштүг соок хаттыг-даа бол, ТШО-же аъттаныр 9 автомашинаны ламалар йөрээл номчааш, айызаан. Ол ышкаш ыдыктаан кадактарны база шарып , оолдарның сүлде-сүзүү бедик болзун дээш белеткеп кааннар.
Тывада Улусчу фронтунуң удуртукчузу Саима Далчин, апрель төнчүзүнде үш дугаар автоколоннаны база чорудар деп дыңнаткан. Амдыызында ук техниканың септелге ажылдары кидин түлүк. Ынчан 10 ажыг машинаны Тываның мурнундан чорудар.
