Владислав Ховалыг өрт айыылының тускай дүрүмнерин сагыырынче чаңгыс чер чурттугларын кыйгырган

Тываның Баштыңы Владислав Ховалыг өртке удур тускай чурумну эң-не шыңгыы сагыырының дугайында кыйгырыы-биле республиканың чурттакчыларынга үнген. Регионда арга-арыг өрттери-биле байдал берге бооп артпышаан. Өрт сезону эгелээнден бээр 35 өрт бүрүткеттинген.

«Кол чылдагаан – кижиде. Эрги сигенниң шөлдерни өрттедири, ыяш кезери, өжүртүнмээн таакпызын октаанындан» - деп, республика Баштыңы демдеглээн. Ынчангаш арга-арыгже кирерин болгаш бойдус хүрээлеңинге от кыпсырын бүрүнү-биле хораан тускай чурумну чарлаттынган.

«Өгбелеривистиң бойдуска камныг хамаарылгазының ачызында мындыг онзагай, чараш черлиг бис. Өрттен чурттакчылыг черлерни, тайганы камгалаар херек. Оттуң айыылының болгаш ооң уржуктарының дугайында ажы-төлүңерге чугалаарыңарны ада-иелерден дилеп тур мен. Бичии-даа частырыг аар болгаш улуг хемчээлдиг чидириглерже чедирер» - деп, Тываның Баштыңы бодунуң блогунда бижээн.

Өрттү өжүрериниң чарыгдалдары, ооң когаралы болгаш шүүделиниң хемчээли - чүгле бир талазы-дыр. Арга-арыгны катап тургузарынга он-он чылдар херек доктаамал улуг ажыл-дыр. Арга-арыг өртчүлери баштайгы 24 шак дургузунда өрттерниң чартыындан хөйүн өжүрүп, кызымаккай ажылдап турарлар. Ынчалза-даа изиг агаар оон хөйнү кылырынга биске шаптыктап турар. Ынчангаш арга-арыг өрттери-биле демисежирде кады күжениишкиннер болгаш арга-арыгны камнаар ниити харыысалга херек дээрзин Владислав Ховалыг сагындыраал.

Хамааты камгалал болгаш онза байдалдар албанының дыңнатканы-биле алырга, май 2-ниң хүнүнде, Тыва Республиканың арга-арыг шөлдеринде, ооң иштинде «Туранский» арга-арыг ажыл-агыйының болгаш «Азас» заповеднигиниң девискээринде, ниитизи-биле 5 гектар шөлдү ээлээн 2 арга-арыг өрттери хып турар. Ниитизи-биле 41 кижи болгаш 5 техника ону өжүреринге киржип турар. Республиканың Арга-арыг яамызының курлавырында 250 кижи болгаш 125 санныг техника бар.