Вы здесь
Тываның ортумак өөредилге черлеринче хүлээп алыышкын кампаниязы: киирген билдириишкиннерниң саны 6,5 муң ашкан
29.07.2025, 21:32 1086 просмотров
Тываның техникумнары болгаш колледжтеринче документилерни август 15-ке чедир хүлээп алыр, ынчалза-даа ам безин абитуриентилерниң саны хөй: июль 25-ке чедир 6,5 муң билдириишкинни киирген. Эрткен чыл-биле деңнээрге, ол 1000 кижи хөй болуп турар. Оларның аразында 75 хуузу 9 класстың доозукчулары болур.
Эрткен неделяда вице-премьер Дмитрий Чернышенко база чырыдыышкын сайыды Сергей Кравцов ортумак өөредилге черлеринде хүлээп алыышкын дугайында таныштырып тура, чурттуң техникум болгаш колледжтеринче кирер күзелдиглерниң саны көвүдээнин демдеглээннер.
«Ажылчын мергежилдер аныяктарны сонуургадып турар, а колледж-техникумнарның доозукчулары ажыл берикчилеринге дыка херек. Ам безин эрткен чыл-биле деңнээрге, билдириишкиннер саны 800 муң чедир өзе берген. Ол дээрге чугула үре-түңнел болур. Чурттуң Президентизи Владимир Путин 2028 чылга чедир 1 сая специалистерни болгаш квалификастыг ажылчыннарны белеткээр дугайында сорулганы салган» - деп, Дмитрий Чернышенко демдеглээн.
Тывада 2025/2026 өөредилге чылында ортумак өөредилге черлеринде 3181 олут бар. «Аныяктар болгаш уруглар» национал төлевилелдиң иштинде «Профессионалитет» федералдыг программа езугаар даг-тудуг кластеринде техниктиг мергежилдерде 1930 бюджет олудун аңгылаан, оон аңгыда 455 олут көдээ ажыл-агый талазында база 700 ажыг олутту медицина, өөредилге болгаш күш-культура, уран чүүл база культура адырларында аңгылаан.
Россияның чырыдыышкын сайыды ооң мурнунда 2025 чылдың хүлээп алыышкын кампаниязында ортумак өөредилге черлеринче сонуургал улгатканын чугаалап турган. Чурттуң Президентизи Владимир Путинниң удуртканы өөредилге айтырыгларынга хамаарышкан хурал үезинде Сергей Кравцов инженерлиг өөредилгеде школачыларның идепкейин демдеглээн. Школаларның доозукчулары ажылчын мергежилдерни шилип ап турар деп, ол чугаалаан.
«Тыва Республикада сөөлгү чылдарда аныяктарның колледж, техникумнарже кирер сонуургалы улгаткан. Ында «Профессионалитет» федералдыг төлевилелдиң үлүг-хуузу улуг. Ук төлевилел езугаар ортумак өөредилге адыры улуг деткимчени ап турар. Студентилер өөредилге үезинде практиктиг арга-дуржулганы ап, чаа дериг-херекселдерде өөренип турар. Регионнуң бүдүрүлгелери-биле керээлерни чарып, доозукчулар дораан ажылче тургустунуп алыр аргалыг» - деп, Тываның агроүлетпир техникумунуң директору Ольга Баркова чугаалаан.
Ортумак өөредилге черлеринче хүлээп алыышкын кампаниязы июнь 20-ден эгелээн болгаш, август 15-ке чедерин сагындыраал. Абитуриентилер чүгле Тываның эвес, а Россияның ортумак өөредилге черлеринче документилерин дужаап болур. Уруглар «Поступление в вуз онлайн» суперсервисти ажыглаар аргалыг.
Суперсервисче 722 ортумак өөредилге программаларын боттандырып турар федералдыг дээди өөредилге организациялары коштунган.
