Вы здесь
Ат-сураглыг режиссер Андрей Болтенко баштаан чогаадыкчы бөлүк Тывада ажылдап турар
25.10.2025, 16:39 742 просмотраРеспубликаның Баштыңы Владислав Ховалыгның чалааны-биле Россияның алдарлыг режиссеру Андрей Болтенко баштаан команда Кызылда чедип келген. 2026 чылда Тыва Республикага болуп эртер IV-кү буддийжи шуулганның культурлуг программазының концепциязын сайзыраңгайжыдар дээш регион-биле таныжып алыры - аалчыларның Тывага келген сорулгазы.
Владислав Ховалыг Андрей Болтенко баштаан команданың регионга чедип келгенин бодунуң социал четкилеринде дыңнаткан. Республиканың Баштыңы продюсер-биле Элистага таныжып алган.
Калмыкияның найысылалынга III-кү буддийжи форумнуң байырлыг ажыдыышкынынга Андрей Болтенконуң «Көшкүн турлаг» деп хөгжүмнүг шиизи езулуг кайгамчык чүүл болган. Бо көргүзүгнү ховуда тургускан 10 метр бедик 9-LED экранны ажыглап көргүскен.
Владислав Ховалыг Болтенконуң келгенин дыңнадып тура, Евровидение болгаш Сочиге олимпиада ышкаш улуг хемчээлдиг төлевилелдер-биле ажылдап чораан мастерниң арга-дуржулгазы IV-кү делегей чергелиг сарыг шажын форумга белеткениринге канчаар-даа херек деп демдеглээн.
«Келир чылын болур хемчеглерниң планын болгаш концепциязын ажыл-агыйжы чугаа дамчыштыр эгеледивис. Тыва культуравысты, хүндүлээчел чоруувусту, буддизмниң тыптып төөгүзүн бүгү талазы-биле делегейге көргүзер күзелдиг бис. Программаны чүгле форумнуң киржикчилеринге эвес, а Тываның чурттакчыларынга болгаш аалчыларынга сонуурганчыг болгаш чедингир кылдыр кылыры – бистиң ниити айтырыывыс болур» - деп, Тываның Баштыңы демдеглээн.
«Азия төвү» скульптура комплекизин, Хем-Белдиринде Будданың тураскаалын, Арат шөлүн, Советтиг Тываның 5 чыл ою стадиону дээш, Кызылдың оон-даа өске аңгы-аңгы черлеринге культурлуг программаны хүндүлүг аалчыларга организастаан. Олар Тыва Республиканың Национал музейинге барып, Россияның буддизм университединиң байырлыг ажыдыышкынынга киришкеннер.
Аалчылар республиканың Баштыңы база IV-кү делегей чергелиг сарыг шажын шуулганының оргкомитет кежигүннери-биле ужуражылга үезинде, көрген чүүлдериниң дугайында бодалдарын база шуулган хемчеглериниң концепциязынга хамаарыштыр бодалдарын үлешкеннер.
Андрей Александрович Болтенко – российжи телережиссер, улуг хемчеглерниң продюсери болгаш режиссеру, 2005 чылдан 2016 чылга чедир «1-ги каналдың» кол режиссеру кылдыр билдингир. Ол 2014 чылда Сочиге эрткен Кышкы Олимпий оюннарының ажыдыышкынын болгаш 2009 чылда «Евровидение» конкурузун режиссерлаан.
