Вы здесь
Тываның «Дайынчы үженнери» экономика болгаш саң-хөө үндезиннерин өөренип эгелээн
09.12.2025, 15:45 550 просмотровТывада «Тываның маадырлары» кадрлар программазының киржикчилеринге экономика болгаш саң-хөө талазы-биле ийиги өөредилге курстары эгелээн. Бо удаада Тываның күрүне университединиң эртемденнериниң удуртулгазы-биле киржикчилер регионалдыг сайыттарның болгаш оларның оралакчыларының практиктиг арга-дуржулгазынга даянып, келир үениң лидерлериниң стратегтиг боданыышкынын сайзырадырынга эргежок чугула бюджет болгаш үндүрүг системаларын, рынок байдалын сайгарып, бооп болур айыылды үнелеп, саң-хөө курлавырларын башкарып өөренирлер.
«Киржикчилер ийи неделя дургузунда күрүне болгаш муниципалдыг удуртулганың кол угланыышкыннарын: республиканың инвестиция политиказындан эгелээш, үлетпүр адырының болгаш күш-ажыл рыногунуң онзагайларынга чедир өөренир» - деп, республиканың Баштыңы Владислав Ховалыг бодунуң телеграм-каналында дыңнаткан.
Келир үениң удуртукчуларының шупту угланыышкыннарга сайзыралын модульдуң программазы хандырар кылдыр тургустунган. Ында спортчу танцы эвилелиниң президентизи Максим Овчинников-биле балдыг хореографияга мастер-класс база Тыва улустуң хөөмейжизи Игорь Көшкендей-биле кичээл бар. Ол ышкаш психология кичээлдери, хүннүң-не эртенги шимчээшкиннер, «Тайга» станциязынга спортчу хемчеглер, эштиишкинни база киирген.
Төлевилелдиң киржикчилери бүгү чуртта болгаш республикада хөй-ниити хемчеглеринде киржип турар. Чижээлээрге, Россияның Маадыры база «Тываның маадырлары» кадрлар төлевилелиниң киржикчизи Буян Куулар баштаан Тывадан тускай шериг операциязының хоочуннар делегациязы декабрь 9-тан 11-ге чедир Москваның «Россия» Национал төвүнде «Кады тиилээр бис» деп үшкү форумда киржип турар.
Форумнуң хүн чурумунда тускай шериг операциязының хоочуннарынга социал адаптация болгаш комплекстиг деткимче, оларны ажылга болгаш спортка хаара тудар, аныяктарның патриотчу кижизидилгезинче угланган айтырыгларны көөр. Форум тускай шериг опреациязының хоочуннарын болгаш оларның өг-бүлелерин бүгү талазы-биле деткиир фондунуң кол сорулгазын күүседиринче угланган кады чугаалажыышкыннарның, шиитпирлерни ажылдап кылырының кол шөлү апаар.
