Вы здесь
Тываның чурттакчылары Россия Федерациязының күрүне шаңналдарын алган
04.01.2026, 13:54 559 просмотров
Россия Федерациязының Президентизиниң Чарлыы-биле республиканың чурттакчыларынга күрүне шаңналдарын тывыскан деп, Тываның Баштыңы Владислав Ховалыг телеграм-каналында дыңнаткан. Ол онзагай чоргааралдың чылдагааны - өөрүшкүлүг бо болуушкунда деп, регионнуң баштыңы демдеглээн.
Россияның Президентизиниң чарлыы-биле, хөй ажы-төлдүг өг-бүле Азиат Дадар-оолович база Ирина Евгеньевна Монгуштар «Ада-иениң алдары» орденге төлептиг болганнар. Өг-бүлениң баштыңы Азиат Дадар-оолович – шериг албанныг. Амгы үеде ол тускай шериг операциязының зоназында Ада-чуртунуң мурнунда шериг хүлээлгезин күүседип турар. Ирина Евгеньевна — идепкейжи хамааты туруштуг, Улусчу фронтунуң регионалдыг салбырының волонтеру. Өг-бүле беш ажы-төлдү азырап турар.
Өг-бүлениң чаңчылдарын болгаш үнелиг чүүлдерин быжыглаарынга болгаш кадагалаарынга үлүг-хуузунуң кииргени дээш Монгуштарның өг-бүлези Тываның Баштыңындан Өөрүп четтириишкин бижиин база алган.
Алдарлыг эртемден, география эртемнериниң доктору, профессор, Тыва Республиканың алдарлыг ажылдакчызы, Тыва Республиканың эртеминиң алдарлыг ажылдакчызы, Орус географтыг ниитилелдиң Тывада салбырының эң улуг назылыг кежигүнү, Россияның Эртемнер академиязының Сибирь салбырының Убсунур делегей чергелиг биосферлиг шинчилелдер төвүнүң директору Светлана Сюрюновна Курбатская «Ада-чурттуң мурнунга ачы-хавыяазы» орденниң II чергезиниң медалы-биле шаңнаткан.
Тываның Баштыңы бо бедик күрүне шаңналы – ада-чурттуң эртеминиң сайзыралы дээш Светлана Сюрюновнаның хөй чылдар дургузунда кызымак ажылынга төлептиг үнелел-дир деп демдеглээн.
Владислав Ховалыг күрүне шаңналдарынга төлептиг болган чаңгыс чер чурттугларынга байырны чедирип, оларның үлегер-чижээ эки ажыл-херектерже болгаш Ада-чуртка бараан болурунга хей-аътты берип турар деп демдеглээн.
