Шагаан-Арыг хоорайда уругларның уран чүүл школазының оран-савазында чаартылга ажылдары уламчылавышаан

Тыва Республикада «Көдээ суурларның комплекстиг хөгжүлдези» күрүне программазын чедимчелиг боттандырып турар шенелде муниципалдыг тургузуг – Улуг-Хем кожуун. «Көдээ суурларның амгы овур-хевири» деп федералдыг төлевилелдиң ол программазы-биле бо хүннерде Шагаан-Арыгда 150 олуттуг уругларның уран чүүл школазында эде чаартылга ажылдары чоруп турар.

Күрүне программазының күүселдезин хайгаарап турар Тываның Экономиктиг сайзырал яамызы чыл эгезинде уругларның уран чүүл школазында септелге ажылдары 53 хуу чеде бергенин дыңнаткан. Тудугнуң соңгаларын салган, объектини электри четкизинде, төпчүткен суг хандырылгазында, чылыг болгаш канализация системаларында кошкан.

Тудугну харыылап турар хууда сайгарлыкчы О.К. Аракчаа муниципалдыг керээ езугаар бо чылдың төнчүзүнге чедир ажылды доозар. «Тардан-Голд» КХН өөредилге албан чериниң тудуунче 9,5 млн рубль спонсор дузаламчызын бергенин демдеглээри чугула.

Уругларның чаа хөгжүм школазының тудуу уругларның болгаш элээдилерниң өөредилгезинге, чогаадыкчы салым-чаяанын сайзырадырынга, хөгжүм уран чүүлүнүң талазы-биле мергежил шилип алырының программаларын боттандырарынга идигни бээр.

«Көдээ суурларның комплекстиг хөгжүлдези» күрүне программазы-биле Улуг-Хем кожуунда элээн каш социал объектилерни тудуп, чаарткан. Чижээ, 2025 чылда Чодураа суурда 176 өөреникчиге школаны туткан, 1 дугаар школада капитал септелгени чоруткан, Шагаан-Арыг хоорайның Малчын кудумчузунда суг шугумун тудуп дооскан.

2026 чылда Улуг-Хем кожууннуң төвүнде хөй талалыг спорт шөлүнүң тудуун күрүне программазы-биле эгелээр.

https://rtyva.ru/press/tuva-news/7097/