Тываның үш суурунга чаа культура төптерин тудуп эгелээр

Тываның Баштыңы Владислав Ховалыг бо чылын «Сорунза» губернатор төлевилели-биле Тээли, Сайлыг, Арыг-Үзүү, Ээрбек суурларга чаа культура төптериниң тудуу эгелээрин дыңнаткан. Губернаторнуң эгелээшкини көдээ суурларда культура албан черлериниң инфраструктуразын чаартырынче угланган.

1967 чылда Тээли суурга клуб бажыңын туткан. Тываның Культура яамызы Бай-Тайга кожуун чагыргазы-биле кады объектиге улуг септелге ажылдарын кылырының аргазын көрген. Ындыг болзажок, республиканың Баштыңы Владислав Ховалыгның даалгазы-биле ол шиитпирни катап эде көрген.

«Эгезинде оран-савага улуг септелгени чорудар планныг турдувус, төнчүзүнде, кижилерге амгы үениң, делгем, таарымчалыг культура одаа херек деп түңнелге келдивис. Бөгүн меңээ бир ай дургузунда төлевилел-смета документациязы белен болур деп илеткедилер» - деп, республика баштыңы бодунуң МАХ каналынга дыңнаткан.

Губернаторнуң инициативазын боттандырып эгелээнден бээр, 16 чаа культура албан черлери туттунган. Эрткен чылын Бай-Тайга кожууннуң Найырал суурда база Улуг-Хем кожууннуң Торгалыг суурда культура одагларын чаарткан.

Төлевилел кады акшаландырыышкын-биле боттанып турар: республика бюджединиң акша-хөреңги-биле тудуг материалдарын, эт-септи, дериг-херекселди садып ап турар болза, тус чер бюджеттери техниктиг негелделер, чөпшээрел документилерин, транспорт чарыгдалдарын болгаш өске-даа херектиг чүүлдерни хандырарын харыылап турар. Чаа тудугларны тус чер чурттакчыларының киржилгези-биле тус чер чагыргалары башкарып турар.

https://rtyva.ru/press/tuva-news/7453/