Георгий лентазы: школачылар болгаш студентилер идепкейлиг киржип турар

Тываның өөредилге албан черлери Тиилелге хүнүн таварыштыр маадырларның эрес-дидим чоруунуң дугайында сактыышкыннарны кадагалап арттырар дээш янзы-бүрү хемчеглерни эрттирип турар.  Георгий ленталары - дайынчы алдар болгаш чоргааралдың ыдыктыг демдээ, бистиң солдаттарывыстың маадырлыг чоруу. Ону Ада-чурттуң Улуг дайынының тиилекчилериниң маадырлыг чоруунга хүндүткел кылдыр чүрек дужунга ызыртып алыр.

1730 чылдарда кара, сарыг, ак өңнерни Россия империязының күрүне өңнери кылдыр санап турган. Георгий лентазы Ыдыктыг Георгий Тиилекчи орденин тургузуп турда, 1769 чылдың ноябрь 26-да, тывылган.

Бүдүн чуртта ышкаш Тываның школачылары болгаш студентилери дайынның хоочуннарынга, дайын шөлүнге амы-тынындан чарылганнарга, чоннуң чаагай амыдыралы, тайбың дээш тулчуп чорааннарга тураскааткан "Георгий лентазы" акцияда киржип турар. 

"Георгий лентазы" бүгү Россияның акциязы Тывада апрель 11-ден эгелээнин сагындыраал.

https://vk.com/minobrtuva?w=wall-38636573_43462&ysclid=lvy1ak0mwt537410083