Аныяк мөгелерге хүндүлүг аттарны тывыскан

Бөгүн, август 15-те, Республика хүнүнге тураскааткаткан 18 харга чедир мөгелер аразынга тыва хүреш маргылдаазы болуп эрткен.

Тыва Республиканың Дээди Хуралының (парламентизиниң) Даргазы Кан-оол Тимурович Даваа хүреш маргылдаазының байырлыг ажыдыышкынынга Тыва Республиканың Баштыңы Шолбан Валерьевичиниң Кара-оолдуң, Тыва Республиканың Чазааның болгаш Дээди Хуралының мурнундан чыглып келген чонга Республика хүнү-биле байыр чедириишкинин кылган. 

162 шыырак аныяк мөгелерниң аразынга болган маргылдаа бедик деңнелге эрткен. 

Түңнелинде Улуг-Хемниң мөгези Натпит Найыр болгаш Барыын-Хемчиктен Домаалай Авырал үшкү-дөрткү черни алгаш, Тыва Республиканың Аныяк Начын мөгелери деп хүндүлүг аттарны чаалап алганнар. Үжүүрлешкен мөге Сүт-Хөлден Күндесонам Ондар Тыва Республиканың Аныяк Эзир мөгези болган, шүгген мөге Улуг-Хем кожуундан Хүлер Түлүш Тыва Республиканың Аныяк Арзылаңы деп хүндүлүг атты алган.

http://www.khural.org/press/news/3642/