Вы здесь
Часкы тарылгага белеткел
14.04.2023, 19:44 1354 просмотра
Тыва Республиканың Чазааның даргазының көдээ ажыл-агый талазы-биле оралакчызы Уран-оол Алдын-оолович Ондар Улуг-Хем кожууннуң араттары-биле ужуражып, часкы хову ажылдарынга белеткелин чугаалашкан.
Чоокта чаа Сибирь регионнарының чыылган хуралынга чорааш Уран-оол Алдын-оолович бо чылын дүжүт ниитизи-биле регионнарга эки болурун, ынчалза-даа синоптиктерниң дыңнатканы-биле чайның башкы айы июньда өске регионнарга бодаарга Тывага каңдаашкын бооп болурунуң дугайында хуралга дыңнаанын араттарга дамчыткан. Оон ыңай Уран-оол Алдын-оолович чуртта экономиктиг байдалды таныштырган.
Араттарның айтырыглары хөй болган. Чижээ, Тываның агроуниверситединде, Кызылдың көдээ ажыл-агый техникумунда, Балгазында көдээ ажыл-агый техникумунда өөренип турар студентилерниң практиказын көдээ ажыл-агый бүдүрүлгелеринге эрттирер кылдыр чурумчудар дилегни киирген. "Оргаадай" көдээ ажыл-агый бүдүрүлгезиниң база өске-даа тараажыларның ажылчыннары, комбайнерлар, трактористер долу эвес мобилизацияга таваржып, дайынчы операцияда киржип турар. Оларның орнунга ажылчыннар тып алыры берге, опыт-дуржулгазы эвээш азы күзели чок болур.
Араттарның ажылынга агаар-бойдус шаптыктаарындан аңгыда, өстүрүп алган продукциязын садып-саарып алыры, ону кыштадыр шыгжаары берге. Ажаап алган дүжүдүн хереглекчилерге, тодаргайлаарга, школаларга, уруглар садтарынга мөөңү-биле дужаап, орай-даа болза акшазын санажып ап турар. Ам улуг организациялар эмнелге, хоочуннар бажың-интернадынга дужаар дээрге, тендер ойнап алган сайгарлыкчылар соңгаартан эккелген шынар чок продукциязы-биле хандырар боор, ынчангаш тус черниң дүжүдү саттынмайн чыдып бээр.
Амгы үеде тракторну, комбайнны башкарарда чөпшээрелдиг механизатор документизин (правазын) негеп турар апарган. Ынчангаш ажылга хаара тудар төптү таварыштыр механизатор курстарынга өөредирин дилээннер. Айыыл чок чорук дугайында база чугаалашкан. Чүге дээрге трактор-биле чиик машина үскүлешкеш айыыл-халапка таваржып, чидириглер болуп турарын, техниктиг байдалын эки хынаарын, хову-шөлдерни өрттен камгалаарын, өрт кезээ тайылбыр ажылын чорударын, мал-маганны тараа, ногаа шөлдеринче киирер болза, торгаал онаар дугайында айтыышкын үндүрерин суму чагыргаларынга дагзыр дээш өске-даа айтырыгларны чугаалашкан.
